So brast fyri nev á Skála.
Tað skuldu ganga 24 umfør, áðrenn tað eydnaðist, men sum støðan nú var blivin í Betri-deildini, so var tað nú ella slett ikki hjá Skála.
Heimaliðið tók ímóti AB, ið eins og Skála ongan dyst hevur vunnið í ár, men kortini hevur AB fingið væl meira burtur úr sínum 14 málum enn Skála hevur fingið burtur úr sínum 16, sum liðini høvdu skorað undan hesum umfarinum. AB hevði sjey javnleikir á talvuni og tí sjey stig, Skála hevði bara tríggjar javnleikir og trý stig.
Við bara trimum umførum eftir at spæla eftir hetta, var greitt fyri øll, at Skála skuldi vinna dystin móti AB, um liðnum skuldi vera lív lagað í Betri-deildini í ár.
Vann AB, so var munurin sjey stig, og við bara níggju stigum at spæla um, máttu sjálvt teir allar bjartskygdastu skálafjeppararnir viðganga, at tá hevði sæð svart út.
Men nú dysturin er liðugur kunnu vit staðfesta, at Skála vann dystin, sín fyrsta dyst í ár, við tveimum málum móti ongum. Kristian Martin Jakobsen legði Skála á odda miðskeiðis í fyrra hálvleiki, og AB hjálpti skálamonnum upp á 2-0, tá argjamenn gjørdu sjálvmál stutt inn í seinna hálvleik.
Úrslitið hevur við sær, at Skála nú bara er eitt stig aftanfyri AB í stigatalvuni, og hóast mótbrekkan fram móti kappingarenda framvegis er ómetaliga, ja kanska ómenniskjansliga, tung, so hómar Skála nú bjargingina í deildini.
Um tað fer at eydnast, kann bara tíðin vísa. Skráin hjá Skála næstu umførini er, at B36 kemur á vitjan í næsta umfari, og so hevur liðið tveir útidystir eftir. Tann fyrri er ímóti EB/Streymi og tann seinasti dysturin í ár er ímóti TB.
AB hevur fýra dystir eftir. HB kemur á vitjan í næsta umfari, so skal AB til Fuglafjarðar áðrenn teir so skulu eitt legg til Klaksvíkar at spæla ein útsettan dyst, og so endar kappingarárið á heimavølli ímóti EB/Streymi.
Úrslit í 24. umfari:
HB-Víkingur 4-0 (3-0)
03.: 1-0 Hørður Askham
10.: 2-0 Adrian Justinussen
22.: 3-0 Mikkel Dahl
60.: 4-0 Hilmar Leon Jakobsen
ÍF-NSÍ 2-3 (1-0)
37.: 1-0 Andy Olsen, br.
57.: 1-1 Petur Knudsen
61.: 1-2 Mórits Heini Mortensen
71.: 1-3 Petur Knudsen
80.: 2-3 Andy Olsen, br.
Skála-AB 2-0 (1-0)
1-0 Kristian Martin Jakobsen
2-0 Mikkjal T. Hentze, sjálvmál
KÍ-EB/Streymur 2-1 (1-0)
18.: 1-0 Jóannes Danielsen
72.: 2-0 Heini Vatnsdal
86.: 2-1 Arnbjørn Hansen
B36-TB 2-0 (1-0)
14.: 1-0 Sebastian Pingel
69.: 2-0 Árni Frederiksberg
