Eirikur í Jákupsstovu er nú landsstýrismaður í almanna- og mentamálum. Á samkomu í Tinganesi fyri løtu síðani handaði Aksel V. Johannesen løgmaður Eiriki skjal, sum er ítøkiligt prógv um, at Eirikur er landsstýrismaður.

Eirikur í Jákupsstovu er ættaður av Eiði. Hann er útbúgvin løgfrøðingur og býr í Klaksvík.

Á løgtingsvalinum 8. desember 2022 fekk Eirikur í Jákupsstovu 295 persónligar atkvøður. Hann var nummar sjey á listanum. Tjóðveldi vann seks umboð í tingið. Tá ið flokkurin varð partur av samgonguni og trý av valdu tingfólkunum fóru í landsstýrið, var Eirikur í Jákupsstovu ein av trimum, sum tóku við tingsessi.

Nú skiftir Eirikur í Jákupsstovu tingsessin út við sessin sum landsstýrismaður í almanna- og mentamálum.