Leygarkvøldið tann 9. september spæla tvær bólkar í Tøting í Syðrugøtu.
DÓTTIR er ein trio ið hevur grundarlag í Keypmannahavn, við rótum úr Føroyum, Italia og úr Danmark.
Bólkurin útgav fyrsta staklagið í 2014, og hava síðani í høvuðsheitum spælt konsertir í Keypmannahavn og á Fyn.
Føroyska Súsanna Herálvsdóttir, sangarinna, høvundur og stovnari av bólkinum, var á tónleikaferð í Russlandi við hennara tónleiki í oktober 2015, har hon var í ferðalagi við Yggdrasil og Marius.
6. apríl í ár, koma fyrsta útgávan hjá DÓTTIR "Division" á marknaðin, Plátufelagið TUTL gav út.
Við hesum sjónbandalagnum, kanst tú fáa eina kenslu av, hvat verður í væntu í Tøting tann 9. September:
https://www.youtube.com/watch?v=AXyeKCqebts
Silvurdrongur
Høvuðsmaður aftanfyri Silvurdrongin, er ungi og sera evnaríki yrkjarin og sangskrivarin Trygvi Danielsen. Trygvi vann virðislønina til "Ungt listafólk 2013" frá Mentanarvirðislønum landsins, júst fyri sínar framúr yrkingar, ið hann gav út á bók, LP og fløgu, undir heitinum The Absent Silver King, ið eisini var heitið á hansara táverandi tónleikabólki, tann bólkurin vann eisini tónleikakappingina Sement í 2013.
Silvurdrongur er so ein nýggj tónleikalig verkætlan, ið enn ikki hevur útgivið nakað, men óiva er onkur útgáva ávegis, tí tilfarð er nógv og gott. Tekstirnir eru á føroyskum, teir eru nærgangandi "in your face", hugvekjandi, slóðbrótandi, rútmiskir og væl skrivaðir, og enntá fært tú teir framførdar og framlagdar á ein heilt serligan hátt, ið bara Trygvi dugur.
Umfrakt dygdirnar handan yrkingarnar og framførslunar, er bólkurin av krúti, ein rúgvusmikil manning av frálíkum tónleikarum.
Silvurdrongur átti avgjørt eina av bestu framførslunum á ársins G! Festivali, og sama manning verður at síggja aftur í Tøting, tað verður vilt...
Manningin er:
Tryvgi Danielsen, Torleik Mortensen, Per I. H. Petersen, Mathias Kapnas, Knút H. Eysturstein, Karl Andrias Stórá
Atgongumerki á 150 kr. (tó bert 100 kr. fyri limir í Grót), fáast til keyps í forsølu her: https://gfestival.fo/products ella við dyrnar hálvan tíma undan byrjan.
