Donald Trump hevur verið útihýstur frá fleiri sosialum miðlum, eftir at hann eggjaði viðhaldsfólk sínum at leypa á Kongressina fyrr í ár. Trump kærdi hesa avgerð, og nú sigur umsjónarráðið hjá Facebook, sum eisini eigur Instagram, at fyrrverandi forsetin ikki fær loyvi at koma aftur á Facebook og Instagram.

Tað boðar ráðið frá í einum boðum á heimasíðu sínari, sambært DR.

Sambært umsjónarráðnum var tað tó at gera ov nógv av, at Facebook í januar valdi at útihýsa Trump í óásetta tíð. Tí skal Facebook umhugsa avgerðina innanfyri seks mánaðar, stendur at lesa í avgerðini.

Í gjár kunngjørdi Donald Trump, at hann fór at byrja sín egna sosiala pall, ið nevnist “From the Desk of Donald Trump”.

Trump varð útihýstur frá Twitter og mongum øðrum sosialum miðlum eftir uppreistin og ófriðin, sum viðhaldsfólk hansara vóru atvoldin til, tá tey lupu á Kongressina tann 6. januar í ár.

Áðrenn tað hevði Trump millum annað verið sera virkin á Twitter í nærum tíggju ár, har hann javnan kom við ymiskum útsagnum um politikk, síni mótstøðufólk og førdi eisini valstríð á sosiala miðlinum.

Trump hevði yvir 80 milliónir fylgjarar, tá Twitter valdi at steingja hansara konto.