Don Everly, annar bróðurin í Everly Brothers, er deyður, 84 ára gamal.
Ein talsmaður hevur sambært BBC boðað frá deyðanum hjá Don Everly fyri Los Angeles Times, men talsmaðurin vildi ikki siga, hvørjum Don Everly doyði av.
Everly brøðurnir høvdu nógvar kendar sangir í 50'unum og í 60'num, og nógvir teirra kennast aftur í senditíðini í Kringvarpinum, teirra millum "All I Have To To Is Dream" og "Bye Bye Love".
Everly brøðurnir fóru hvør til sítt eftir eitt skeldarí á palli í 1973, og sum skilst tosaðu teir ikki saman í nógv ár eftir hetta. Phil Everly fortaldi kortini seinni fyri Time Magazine, at viðurskiftini teirra millum høvdu lagað seg, og teir royndu seg aftur við einari plátu og einari konsert í London.
Don Everly andaðist í heimi sínum í Nashville, hevur talsmaður hansara boðað frá.
Phil Everly doyði í 2014.
