Tíðindaskriv frá Sjúkrahúsverkinum:
Dialysan á Suðuroyar Sjukrahúsi hevur fylt nógv í almenna orðaskiftinum hesa síðstu tíðina – bæði í almenna kjakinum, men ikki minst fyri teir sjúklingar, sum hava sitið og bíða eftir, at tilboðið um hæmodialysu gjørdist klárt.
Arbeitt hevur verið dúgliga fyri at tryggja, at sjúklingurin fær góða og trygga viðgerð við dialysu á Suðuroyar Sjúkrahúsi, og nú er loksins klárt at fara í gongd.
Sjúkrahúsverkið hevur arbeitt tætt við fakfólki um karmarnar runt viðgerðina, og hevur fingið fakligt tilmæli umvegis Dansk Nefrologisk Selskab um, at dialysuviðgerð kann veitast á Suðuroyar Sjúkrahúsi.
Málið um dialysuna hevur verið ein longri tilgongd, har fleiri partar av Sjúkrahúsverkinum hava arbeitt ótroyttiliga saman, um at finna eina loysn. At vit nú eru komin á mál vísir styrkina, sum liggur í einum sameindum Sjúkrahúsverki.
Sjúkrahúsverkið hevur givið boð um, at dialysuviðgerðin skal setast í gongd á Suðuroyar Sjúkrahúsi frá 4. mars 2024.
Steinar Eirikstoft, forstjóri í Sjúkrahúsverkinum,
og Hanus Toftheyggj, stjóri í Sjúkrahúsverkinum
