Danmark fær nýggjan politiskan flokk
Flokkurin kallar seg Feministisk Initiativ, og vil fyrst og fremst seta diskriminatión á breddan
Guðrun í Jákupsstovu
7. september 2017 kl. 13:32
Í vikuni bleiv tað kunngjørt at ein nýggjur politiskur flokkur, nú vil uppí danskan politikk. Talan er um flokkin Feministisk Initiativ, sum longu hevur skotið seg upp í grannalondunum Svøríki, Noregi og Finnlandi.
Við DR sigur talskvinnan, Marie Raasthøj Hansen, at flokkurin bleiv stovnaður, tí ongin annar danskur flokkur hevur antirasismu og javnstøðu sum høvuðsmál. Tað snýr seg um at berjast ímóti diskriminatión á øllum økjum, leggur Marie Raasthøj Hansen dent á. Til dømis vil tað siga, at spurningurin um barsil snýr seg um at javnseta mannin við konuna.
Flokkurin hevur higartil seks kandidatar og ætla at royna at fáa fleiri afturat sær til borgaraumboðsvalið í Keypmannahavn.
