Christian prinsur var føddur 15. oktober í 2005 og er elsti sonur Frederik krúnprins og Mary krúnprinsessu. Sostatt er hann annar í arvafylgjuni at gerast kongur eftir Margretu drotning.
Upprunaliga skuldi Christian prinsur fermast síðsta ár, men vegna koronafarsóttina var fermingin útsett til í gjár. Hetta merkir, at Christian prinsur nú er 15 ára gamal. Til samanberingar ber til at nevna, at Frederik krúnprinsur júst hevði fylt 13 ár, tá ið hann játtaði sín dóp í 1981.
Dagurin var nógv ávirkaður av koronastøðuni í Danmark og uttanlands. Lone Balleby er samskiftisstjóri í danska hovinum, og hon greiðir soleiðis frá:
-Vegna koronastøðuna taka eingir útlendskir gestir lut í fermingardegnum hjá Christiani prinsi.
Hetta merkir, at fleiri av tøttu familjulimunum hjá krúnprinsfamiljuni ikki høvdu møguleika at taka lut í degnum. Eitt nú Joakim prinsur, Maria prinsessa og teirra felags børn, ið búgva í Frankaríki, abbi hansara í móðurætt, ið býr í Englandi, og restin av familjuni í móðurætt, ið býr í Avstralia.
Hóast familjulimirnir í útlondum ikki vóru við á sjálvum degnum, hevði konfirmanturin teir í tonkunum:
-Tað er sjálvandi harmiligt, at øll í familjuni ikki kunnu vera við. Men soleiðis er tað. Tey eru í okkara hjørtum og tonkum, segði Christian prinsur við tíðindafólk á staðnum.
Í løtuni kunnu í mesta lagi 25 fólk savnast í Danmark, og sostatt vóru einans 25 fólk við til hátíðarhaldið hjá Christiani prinsi. Millum gestirnar vóru systkinabørnini Nikolaj prinsur og Felix prinsur, gubbin Jeppe Handwerk og vinfólk hjá Christiani prinsi.
