Danskir og italskir miðlar hava gitt tað leingi, og nú vísir tað seg, at tað er nakað um tað. Eftir einans eitt hálvt ár í Inter, er Christian Eriksen komin á sølulistan hjá italska felagnum úr Milano, Inter.
Hetta váttar stjórin í felagnum, Giuseppe Moratta, at danski miðvallarin er til sølu.
- Hann fer frá okkum í januar. Hann passar ikki inn í okkara ætlanir, og hann hevur ikki havt tað lætt her í Inter, sigur stjórin í Inter, Giuseppe Moratta, fyri Sky Sport Italia.
Christian Eriksen kom annars til Inter í januar í ár, eftir at hava spælt seks og eitt hálvt ár í Tottenham, men nú sær tað út til, at hann longu skal víðari.
- Sjáldan hevur eitt leikaraskifti virkað meira upplagt enn hetta. Hetta er, sum mann róliga kann kalla tað, eitt stutt kærleikssamband, ið bara ikki riggaði, sigur fótbóltsfrásøgumaðurin hjá DR Sport Andreas Kraul.
