Løgreglan kannar nú eisini bretska forsætisráðharran, Boris Johnson, og hansara starvsfólk í samband við nakrar veitslur, ið hava verið hildnar í embætishúsinum hjá forsætisráðharranum í Downing Street nummar tíggju, hóast strong koronutiltøk vóru galdandi í Stórabretlandi í koronatíðini.
Gray-kanningarnevndin kannar eisini málið, har ein niðurstøða í tí kanningini eru væntandi ein av komandi døgunum.
– Hetta fer at hjálpa til at fáa greidleika í hesum málinum, sigur eitt talsfólk hjá forsætisráðharranum um løgreglukanningina.
Síðstu vikurnar hava bretskir miðlar almannakunngjørt, at tað hava verið hildin fleiri veitslur og samkomur av tí váta slagnum í Downing Street Number 10 í koronatíðini, sum er í stríð við koronuavmarkingarnar, ið vóru galdandi í Stórabretlandi um hetta mundi.
Fyri einari viku síðan mátti Boris Johnson eisini viðganga, at tað varð ein føðingardagur hildin í embætishúsinum í juni 2020, umframt at veitsla varð hildin í nummar tíggju tvey samdøgur áðrenn Philip prinsur bleiv jaraður. Eisini mátti Boris Johnson herfyri standa skúlarætt í bretska Undirhúsinum, tí hann hevði hildið eina “bring your own booze” garðveitslu, sum hann sjávur, sambært honum sjálvum, bert luttók í veitsluni í 20 minuttir og fór so aftur í kontórið, tí hann helt veitslan varð hildin í samband við arbeiði.
