Í gjar var atkvøtt í tveimum valdømum í Bretlandi um, hvør skal umboða borgararnar í valdømunum á tinginum. Talan var um val í Wakefield valdøminum og í Tiverton og Honiton valdøminum.
Konservativi flokkurin hjá bretska forsætisráðharranum, Boris Johnson, tapti bæði valini. Sostatt misti Konservativi flokkurin, við Boris Johnson á odda, tveir sessir í bretska tinginum í gjár.
Í Wakefield vann, Labour flokkurin, ið er størsti kappingarneytin hjá Konservativa flokkinum. Í hinum valdøminum, Tiverton og Honiton, vann Liberal Demokratiski flokkurin.
Bretski forsætisráðharrin er undir stórum trýsti í løtuni, og vánaligu valini í gjár gjørdu ilt verri. Fyri fáum vikum síðan var atkvøtt innanhýsis í konservativa flokkinum um, hvørt meirilutin í flokkinum stuðlaði Boris Johnson, tá vann Boris Johnson innanhýsis valið.
Í gjár vísti bretski forsætisráðharrin aftur, at hann fór at trekkja seg, um flokkur hansara tapti bæði valini. Í dag heldur hann enn fast í hesum, men hann lovar at lurta eftir veljarunum.
