Amerikanski skemtarin og sjónleikarin Bob Saget er deyður, 65 ára gamal.
Løgreglan í Orange County boðar frá, at Saget varð funnin deyður í kamarinum í Ritz-Carlton hotellinum í Orlando í Florida í gjár, men at eingi tekin eru um hvørki rúsevni ella onnur mistonkilig viðurskifti.
Bob Saget, sum hevur virkað sum skemtari nærum alt sítt lív, var júst farin á ferð í USA at framføra, og leygardagin hevði hann framført í Jacksonville í Florida.
Bob Saget gjørdist upprunaliga kendur sum skemtari, og serliga var tað fúla og vanvirðisliga tilfarið, ið gav honum góða undirtøku millum aðrar skemtarar. Tað var kortini karrieran sum sjónleikari, ið gjørdi Saget kendan um alt USA og um okkara leiðir.
Serliga vann Saget tokka fyri leiklutin sum Danny Tanner í sendirøðini Full House, sum hann spældi saman við John Stamos og Dave Coulier frá 1987 til 1995 og frá 2016 til 2020.
Í nýggjari tíð hevur hann lagt rødd til sendirøðina How I Met Your Mother, og eisini spældi hann ein íspunnan leiklut av sær sjálvum í sendirøðini Entourage.
Um okkara leiðir er hann kanska best kendur sum verturin í America’s Funniest Home Videos.
