Ein arbeiðsbólkur hevur í dag handað Bjørt Samuelsen, løgtingsforkvinnu eitt tilmæli um, hvussu tey halda, at lønar- og eftirlønarskipanin hjá tingfólkum eigur at síggja út í framtíðini.
Størstu broytingarnar eru í stuttum, at lønin hækkar úr 34. lønarflokki (kr. 46,375 tann 1. oktober 2023 um mánaðin) upp í 36. lønarflokk (kr. 53,058 tann 1. oktober 2023 um mánaðin) eftir tænastumannastiganum, men samstundis verður tænastumannaeftirlønin avtikin og løgd um til eina vanliga 15% eftirlønarskipan, eins og skattafría mánaðarliga kostnaðarískoytið á 2.000 kr. verður strikað.
Fyri landið verður størsta broytingin, at tann alsamt vaksandi eftirlønarbyrðan av tænastumannaeftirlønarskipanini lætnar, um eisini tingfólk fara yvir til eina vanliga eftirlønarskipan.
Nærri kann lesast um einstøku broytingarnar í tilmælinum, sum finst her.
Bjørt Samuelsen takkaði bólkinum fyri tilmælið og fer nú at samskifta við flokkarnar á tingi um, hvussu farast skal víðari við málinum.
Tilmælið leggur upp til, at talan verður um eina broytta skipan, sum tekur við aftaná næsta løgtingsval, og sum tí ikki fær ávirkan á lønarviðurskiftini í hesum valskeiðnum.
