Bilførari fær stóra bót

Í gjár var rættiliga friðarligt hjá løgregluni. Men í Klaksvík kannaði løgreglan ferðsluna og har varð ein bilførari tikin fyri at brúka hondhildna fartelefon ímeðan hann koyrdi. Tað kostar honum 1.500 krónur í bót og eitt klipp í koyrikortið.

Men verri var hjá einum bilførara í Vágum. Løgreglan hevði steðgað einum bili, men tá ið tey kannaðu málið, vísti tað seg, at bilførarin ikki hevði koyrikort.

Hann hevur mist koyrikortið eina ferð í tíðini og kundi havt tikið tað aftur, men tað hevði hann eftir øllum at døma ikki fingið upp í lag til.

Fyrstu ferð, bilførari verður tikin fyri at koyra við ongum koyrikortið, er bótin 5.000 krónur, so tað varð ein dýrur biltúrur.