Tað er Bernhard H. Petersen, sum fær ársins sálarheilsuvirðislønin frá Sinnisbata.
Sinnisbati sigur, at í nógv ár hevur Bernhard verið virkin í Frelsunarherinum, har hann hevur gjørt eitt serliga gott arbeiði fyri heimleys í Føroyum, sigur Sinnisbati.
Hann var við í arbeiðnum fyri heimleys longu fyri 25 árum síðani, tá ið Herbergið læt upp.
Somuleiðis hevur hann, sum arbeiðsgevari, víst menniskjansligheit og rúmd. Bernhard hevur hjartað á røttum stað og veitir altíð eina hjálpandi hond, har hann kann, siga tey í Sinnisbata.
Bernhard hevur brúkt nógvar nætur saman við heimleysum, sum ikki hava aðrastaðni at vera enn á Herberginum, men hann hevur eisini gjørt nógv annað, sjálvboðið arbeiði.
Sum arbeiðsgevari gevur hann fólki, sum eru illa fyri fíggjarliga, ókeypis el-arbeiði, hann setir lærlingar í starv og hann dugir at fáa tað besta burtur úr hvørjum einstøkum.
Hann fær sostatt sálarheilsuvirðislønina fyri at hava víst eitt heilt serligt samfelagssinni og eina heilt serliga menniskjansligheit.
– Sum arbeiðsgevari hevur hann víst eina ábyrgd, eitt tolsemi og eina fyrigeving ímóti sínum lærlingum, sum ikki er at finna allastaðni, siga tey í Sinnisbata.
