Hósdagin 26. september, um døgurðaleitið, stevndi Hagagjógv av Fuglafirði og til nýggja heimstaðin, Klaksvík. Hon verður sett í vinnu á Borðoyarvík. Tvíkiljan er nýbygningur nummar 18 hjá KJ og varð upprunaliga bygd til fyritøkuna Pan Fish Faroes í 2007.
Tvíkiljan hevur havt fleiri eigarar síðstu árini, og seinasti eigarin var íslendska alifyritøkan Arnarlax. KJ keypti tvíkiljuna heim úr Íslandi í fjør heyst, eftir at ein lítil eldsbruni hevði verið í stýrhúsinum. Tvíkiljan er so gott sum høvuðsumvæld, og gjørd klár at fara í vinnu hjá Bakkafrost.
Stutt um tvíkiljuna kann sigast at hon er 12 metrar long og 6 metrar breið – tilsamans 17BT. Hon er útgjørd við tveimum FPT N60 motorum við 400hk hvør. Eisini er hon útgjørd við einum 18 tonsmetur dekskrana frá Palfinger.
KJ ynskir Bakkafrosti hjartaliga til lukku við tvíkiljuni.
