B68 ætlar sær ikki at geva seg

Tveir dystir vóru í 12. umfari í bestu fótbóltsdeildini í dag. Dagsskráin var at sleppa burtur frá niðurflytingarstrikuni. Í tí kappingini vunnu Skála og B68 í dag fulla úrtøku á heimavølli, meðan ÍF og EB/Streymur taptu á útivølli.

Í morgin vera tríggir dystir. Tá fer tað at snúgva seg um heiðursmerkjaplássini og møguleikan at vera við í kappingini um atgongumerki næsta summar at vera við í europeisku kappingunum.

Í kvøld vann B68 fyri fyrstu ferð í ár. Jákup á Borg og hansara illa kroystu toftamenn vunnu 2-0 ímóti EB/Streymi.

Villiam Emil Klein var dagsins maður. Hann skoraði bæði B68 málini.B68 er framvegis undir niðurflytingarstrikuni, men sigurin í dag lyfti toftammenn væl nærri møguleikanum at sleppa av níggjunda plássi. B68 hevur seks stig, og EB/Streymur hevur sjey stig.

Hjá EB/Streymi kom tað illa við, at tað fyrstu løtuna var neyðugt at skifta bæði Berg J. Poulsen og Tóka H. Johannesen út.

Á Skála var ÍF vónbrotið stórt. Fuglfirðingar stríddu seg eftir steðgin upp á 2-2, eftir at Skála í fyrra hálvleiki var frammanfyri 2-0. Men so svaraði Skála aftur og skoraði fimm minuttir undan leikloki 3-2 sigursmálið. 3-2 málskjútti var Markus Isaksen, sum lítla løtu frammanundan varð skiftur inn. Hetta var fyrsta ferðin yvirhøvur, at 17 ára gamli Markus Isaksen var málskjútti í bestu deildini.

B68 – EB/Streymur 2-0 (1-0)

1-0: Villiam Emil Klein 38.

2-0: Villiam Emil Klein 79.

Skála – ÍF 3-2 (2-0)

1-0: sjálvmál 13.

2-0: Carlos Ferreira 18.

2-1: Jhon Mena 49.

2-2: Uros Stojanov 71.

3-2: Markus Isaksen 85.

Í morgin

KÍ – Víkingur: Dagfinn Forná kl. 15.15

NSÍ – HB: Heini Ziskason Viðoy kl. 17.00

B36 – 07 Vestur: Rani A. Skaalum kl. 15.00