Fyri løtu síðan bríkslaði dómarin fyri seinastu ferð, í dystinum millum B36 og Haverfordwest í UEFA Conference League.
Úrslitið varð 2-1 til B36 – eitt úrslit, sum Haverfordwest leikararnir eiga at vera sera væl nøgdir við.
B36 hevði so at siga alt spælið meðan Haverfordwest bara rann aftaná. Haverfordwest leikararnir drálaðu longu frá fyrsta bríksli og hetta sluppu teir órevsaðir. Dómarin lat sum luft hvørjaferð málmaðurin brúkti ein minutt uppá málspark og innkøstini fóru eisini við eini 45 sekundum hvørja einastu ferð. Sjálvt tá B36 førdi 2-0 drýggjaðu teir tíðina, so ein skuldi trúð at útiliðið var á odda.
B36 megnaði ikki at sløkkja dystin, og brádliga fingu gestirnir úr Wales eitt tilvildarligt innlegg, sum endaði í málinum handan Mathias Lamhauge.
Málini hjá B36 skoraðu Hannes Agnarsson og Andrass Johansen.
Seinni dysturin í 2. undanumfari millum B36 og Haverfordwest verður í Cardiff um eina viku.
