Tað sær út til at vera sera lítið sannlíkt, at tað fer at eydnast B36 at vinna seg víðari úr triðja umfari í Conference League. Hóskvøldið í næstu viku fer árstalsfelagið at royna seg á útivølli ímóti HNK Rijeka. Í kvøld fóru kroatisku gestirnir av Tórsvølli við 3-1 sigri, og harvið er brekkan øgiliga brøtt, sum B36 skal taka í Kroatia.
Alt sá í kvøld ljóst út fyrsta hálva tíman hjá hvíttklædda B36. Hóast mótstøðumenninir vóru bólttryggir og skjótir, so megnaði B36 við vælskipaðum verjuspæli at halda teimum frá uppløgdum málmøguleikum.
Og tá ið B36 so eftir stóran hálvan tíma fekk hol á, kendist tað í B36 leguni soleiðis, at hetta kundi fara at verða eitt gott kvøld, og at B36 um eina viku fór at hava møguleika í Kroatia at vinna seg víðari í kappingini.
Eftir fáum minuttum kring steðgin vendist alt á høvdið. Fýra minuttir undan steðginum bríkslaði finski dómarin fyri brotssparki til HNK Rijeka og so var 1-1. B36 spælararnir vóru argir og mótmæltu harðliga, tí Michal Przybylski var greitt uttanfyri brotsteigarmarkið, tá ið bólturin rakti hann í armin.
Eftir steðgin skoraði kroatiska liðið tvey mál, og tað verður tungt hjá B36 at vinna tað aftur, sum í kvøld varð mist á Tórsvølli.
Bæði málini eftir steðgin vórðu skorað í sambandi við deyðbóltsstøður. Tað fyrra longu í 48. minutti eftir hornaspark, og tað seinna í 89. minutti eftir fríspark.
B36 – HNK Rijeka 1-3 (1-1)
Conference League
Á Tórsvølli hósdagin 10. august 2023 kl. 19.00
1-0: Hannes Agnarsson 33.
1-1: Niko Jankovic br 41.
1-2: Bruno Goda 48.
1-3: Stjepan Radeljic 89.
Dómarabólkur úr Finnlandi: Mohammed Al Mara, Turkka Valjakka, Juuso Mantero og Peiman Simani (4. dómari)
B36: Mattias H. Lamhauge – Símun Sólheim, Isak Jönsson, Sonni Ragnar Nattestad, Magnus Egilsson, Jann J. Benjaminsen – Andrass Johansen (Erlendur Magnusson, 91.), Eli Falkvard Nielsen (Emil Weihe Joensen, 91.), Taufee Skandari (Valerijs Sabala, 73.), Michal Przybylski (Benjamin Heinesen, 92.) – Hannes Agnarsson (Bjarki C. Nielsen, 51.)
Á beinkinum uttan at verða skiftir inn: Silas Eyðsteinsson, Hans Jørgensen, Andrias H. Eriksen, Marrias Hellisdal, Lukas Giessing, Aron Knudsen
Gult kort: Magnus Egilsson, Bjarki C. Nielsen, Michal Przybylski
Venjari: Dan Brimsvík
Hjálparvenjari:Mikkel Richardt Mortensen
