Eingin ivi var hjá dómsnevndini: Marnar Fríðheim Kristiansen, lækni og phd-lesandi hevur uppiborið miðlaheiðurslønina hjá Granskingarráðnum 2021.
Heiðurin varð latin honum nú seinnapartin í Kongshøll, har vísindavøka hevur verið í allan dag.
Ingi Højsted, dekanur á Setrinum, sat í dómsnevndini saman við Jón Brian Hvidtfeldt, formanni í Føroyskum Miðlafólki og Dagmar Joensen-Næs frá Granskingarráðnum.
Jón Brian Hvidfeldt nevndi serkunnleika í síni grundgeving fyri at geva Marnar Fríðheim Kristiansen heiðurslønina.
Marnar Fríðheim Kristiansen hevur ikki bara gjørt stóran mun í stríðnum móti koronusmittuni, hann hevur eisini gávumilt greitt almenninginum frá og svara ivamálum viðvíkjandi koronusmittuni, umframt at hann hevur granskað sjálvur á økinum. Eisini hevur hann sakliga greitt frá um fakta og falskunning um koppseting, segði Jón Brian millum annað í grundgevingini fyri at geva Marnar Fríðheim viðurslønina.
Á vísindavøkuni, sum hevur verið í allan dag í Kongshøll, varð ein annar granskari heiðraður.
Granskarar høvdu eina snarrøðukapping, har tey í 150 sekund skuldu greiða frá síni gransking.
Domsnevndin metti snarrøðuna hjá Helma Mariu Tróndheim at vera ta bestu.
.png){kind=logo}
