Tað er kappingaravlagandi, at tað bara eru nakrir fáir handlar sum sleppa at selja vanligan hondkeyps-heilivág, og aðrir handlar ikki sleppa.
Tað heldur Jørgen Niclasen, løgtingsmaður fyri Fólkaflokkin. Og nú vil hann hava at vita um landsstýriskvinnan í heilsumálum, Súsanna Bertholdsen, ætlar at gera nakað við tað.
Løgtingsmaður sigur, at á bygd, har einki apotek er, ber til at keypa høvuðpínutablettir, og annan vanligan hondkeyps-heilivág, í handlum. Hann sigur, at tað er ein betri tænasta enn apotekini kunnu veita.
Men í bygdum og býum, har apotek er nærhendis, kann hondkeyps-heilivágur einans keypast á apotekinum.
– Har er sera avmarkað upplatingartíð og serliga í høvuðsstaðum eru langar bíðirøðir á apotekinum, sigur Jørgen Niclasen.
Hann sigur, at hetta er ikki bara at gera mun á tænastuni til borgarar, alt eftir hvar teir búgva. Hetta er eisini kappingaravlagandi fyri handlarnar.
Hann sigur, at Heldur enn at bøta um tænastuna til fólk í Vágum, brúkar Løgtingið nú nógvan pening upp á at gera eitt apotek har.
– Avleiðingin er, at hondkeyps-heilivágur verður tikin úr handlunum í Vágum, sigur Jørgen Niclasen.
Tí vil hann hava at vita frá landsstýriskvinnuni um tað ikki er betri at fara hin vegin og at loyva øllum handlum í landinum at selja vanligan hondkeyps-heilivág.
Hann vísir eisini á, at Kappingareftirlitið er av somu áskoðan. Kappingareftirlitið hevur beinleiðis mælt til, at farið verður eitt stig víðari so at allir handlar fáa loyvi at selja hondkeyps-heilivág.
Hetta hevði givið fólki rúmari ræsur at valt, nær og hvar tey keypa hondkeyps-heilivág - og hetta er eisini vanligt í okkara grannalondum, sigur Kappingarráðið.
