Aksel V. Johannesen í Norðurlandaráðið

Seinasta árið hava løgtingslimirnir Jaspur Langgaard og Høgni Hoydal røkt føroysku áhugamálini í Norðurlandaráðnum. Á fyrsta fundi í løgtinginum hesa setuna, var val av føroysku umboðunum á skránni, og úrslitið varð, at Aksel V. Johannesen avloyvir Høgna Hoydal. Jaspur Langgaard, sum sat frammanundan, heldur fram í ráðnum. 

Norðurlandaráðið varð stovnsett í 1952. Ráðið er eitt samstarvsforum hjá parlamentarikarunum í norðurlondum. Ráðið hevur 87 limir, sum umboða tey fimm londini og tey trý sjálvstýrandi økini. Ráðslimirnir sita í tingunum í londunum og verða tilnevndir av flokkunum har.