Løgmansskrivstovan skrivar í tíðindabrævið í dag, at Bárður á Steig Nielsen hevur biðið løgtingsformannin loysa seg úr starvi um løgmaður, sambært stýrisskipanarlógini §29.
Løgtingsformaðurin fer nú at skipa fyri formansumfari til tess at peika á nýggjan samráðingarleiðara.
Sitandi landstýri virkar formliga sum starvsstjórn, inntil nýtt landsstýri er skipað, skrivar løgmansskrivstovan.
Nýggi samráðingarleiðarin
Formaður í Javnaðarflokkinum, Aksel V. Johannesen, segði við Kringvarpið á middegi, at hann helt tað vera rímiligt at flokkurin sum gjørdist størstur á valinum, fekk samráðingarrættin. Fleiri av forfólkunum hava eisini sagt at tey peika á Aksel V. Johannesen sum samráðingarleiðara.
Formansumfarið avgerð hvør fær samráðingarrættin. Tað er eisini vanligt at størsti flokkur fær samráðingarrættin. Formliga gongur tað fyri seg soleiðis, at forfólkini í flokkunum peika á tann sum tey halda skal leiða samráðingarnar.
Portal.fo skrivar at Jógvan á Lakjuni hevur boðað frá at formansumfarið verður mánamorgunin.
