16.000 nýggir tilburðir

Seinasta samdøgrið eru 16.164 nýggir koronutilburðir staðfestir í Danmark, vísa tøl frá Statens Serum Institut í dag.

Smittutalið er met, og tað kemur bert ein dag eftir, at eitt nýtt met annars varð sett í gjár við 14.844 tilburðum.

Í nýggjastu tølunum eru 639 tilburðir hjá fólki, ið eru smittaði umaftur við koronu.

130.686 fólk vórðu kannaði, og tað gevur eitt positivprosent á 12,4, ið eisini er nýtt met, síðani øll fingu í boði at lata seg kanna.

29 fólk eru innløgd við koronu seinasta samdøgrið, soleiðis at korona í løtuni stendur fyri 608 innleggingum í Danmark.

Sjey fólk afturat eru deyð við koronu. Samlaða deyðstalið er nú 3217.