Óføru U-21 menninir í hondbólti fyrireika seg suðuri í Týsklandi til síðsta dystin í innleiðandi umfarinum í HM endaspælinum. Hann verður í kvøld klokkan 19.15 í Magdeburg ímóti Spania. Tvey stig at hava við í miðumfarið standa upp á spæl.
Samstundis verður av álvara talt niður til oyggjaleikirnar, sum í summar vera á Guernsey. Leikirnir vera í døgunum 8. til 14. juli, og føroyska ferðalagið fer úr Føroyum hósdagin 6. juli.
Hetta er 19. ferðin, at oyggjaleikir eru. 113 íðkarar fara at umboða Føroyar á leikunum.
Tey fyrstu árini vóru Føroyar væl umboðaðar í eitt nú fótbólti og flogbólti – í báðum ítróttargreinum var tað við bæði mansliðum og kvinnuliðum. Tá var føroyska umboðanin í frælsum ítrótti lítið.
Hesaferð eru hvørki fótbóltur ella flogbóltur á skránni. Størsta føroyska luttøkan er í kurvabólti, har Føroyar hava lið við í kappingini fyri bæði menn og kvinnur – 12 kvinnur og 12 menn.
Í frælsu ítróttargreinunum eru Føroyar væl umboðaðar. Ikki færri enn 23 føroyingar fara at luttaka í frælsum ítróttargreinum.
Svimjilandsliðið hevur ofta verið størri, enn tað verður á hesum leikunum. Hesaferð vera 11 føroyingar við í svimjingini.
Ítróttargreinarnar og luttøkutalið er hetta:
Badminton 10
Bogaskjóting 11
Skjóting 8
Borðtennis 8
Golf 5
Súkkling/triathlon 8
Kurvabóltur 12 kvinnur og 12 menn
Frælsur ítróttur 23
Svimjing 11
Tennis 5
Tilsaman 113
