Skrivað hevur: Hans Erik Danielsen Mánadagur 8. februar 2010, kl. 16.29, Dimma.fo
Fyrrverandi føroyski landsliðsleikarin, Claus Bech Jørgensen, umhugsar at gevast, eftir ellivu ár í enskum fótbólti. Í løtuni hevur Claus Beck torført við at finna nakað nýtt felag at spæla fyri, og tí verða fótbóltsskógvarnir væntandi settir á hylluna
Skjótt 34 ára gamli Claus Bech Jørgensen, ið hevur spælt 10 landsdystir fyri Føroyar, umhugsar av álvara at steðga við fótbóltinum, nú tað vísir seg at vera meir enn torført at finna eitt nýtt felag at spæla fyri. Seinastu 11 árini hevur fyrrverandi føroyski landsliðsleikarin umboða seks feløg í lægru deildunum í Onglandi, men seinasta hálva árið hevur Claus Bech ikki megnað at spælt seg til nakran nýggjan sáttmála. - Fyri tíðina venji eg eitt sindur fyri meg sjálvan, og sum heild eri eg væl fyri kropsliga, sigur Claus Bech Jørgensen við bold.dk, sum sigur víðari, at um hann einki felag hevur funnið í nærmastu framtíð, so umhugsar hann av álvara at gevast við fótbóltinum. Claus Bech Jørgensen hevur spælt fleiri enn 300 dystir tey 11 árini hann hevur spælt í enskum fótbólti.
