Vit eta tað sama - men vit pynta okkum nógv meiri
Sølan hjá matvøruhandlum stendur mestsum í stað, men tey, sum selja Smyrsl og annað at pynta seg við, hava góðar dagar
Áki Bertholdsen
2. juli 2024 kl. 09:45
Hagstovan hevur nú gjørt upp, hvussu sølan av ymsum vørum hevur verið fyrsta ársfjórðing í ár aftur ímóti í fjør.
Uppgerðin vísir, at sølan av fríðkanarvørum er heili 12 prosent hægri fyrsta ársfjórðing í ár enn hon var fyrsta ársfjórðing í fjør.
Tá ið prísvøkstur er drigin frá, er mongdin av seldum fríðkanarvørum, hækkað 10 prosent.
Sølan hjá matvøruhandlunum er hækkað næstan fimm prosent í pengum, men verður príshækkingin drigin frá, er sølan hjá teimum hækkað eitt prosent í nøgd.
Hagstovan sigur, at hjá teimum, sum selja húsarhaldsútgerð, er sølan minkað trý prosent, bæði í pengum og í nøgd.
Hinvegin er sølan av ítróttarútgerð sjey prosent størri í ár í nøgd og sølan av klæðum annars, er lækkað átta prosent.
