FM heitið verður í Sarpugerði á mikkjalsmessu

Tað var eingin slingur í valsinum hjá víkingunum, tá ið teir í kvøld vóru á Svangaskarði. Víkingur vann 2-1, og tað er ikki ein spurningur um Víkingur fer at vinna FM, men nær tað verður staðfest, at Víkingur hevur vunnið FM í 2024.

Hóast tølini siga, at talan var um tepran 2-1 sigur á Toftum í kvøld, so var tað ikki fyrrenn við síðsta sparkinum í dystinum, at B68 minkaði um munin. Tað var vorðið sum mál, sum Hjalti Størmsten skoraði úr 25 metrum og heilt upp í málkrókin. Heilt víst evni til at verða kosið ársins mál í 2024.

-Hetta var ikki besta avrikið hjá okkum í ár. Eftir landsliðssteðg ræður tað um aftur at finna fokus í heimligu kappingini. Nú fara vit at fyrireika okkum til leygardagin, tá ið EB/Streymur verður gestur í Sarpugerði, segði Sølvi Vatnhamar eftir dystin í samrøðu við FM1 útvarpið. Hann staðfesti tíðliga í seinna hálvleiki sigurin við brotssparki. Fyrra málið skoraði Jørgen Nielsen.

Umframt ímóti EB/Streymi leygardagin fer Víkingur mikukvøldið í næstu viku at spæla útsettan dyst á heimavøllil ímóti KÍ, og so er skráin hjá FM favorittunum Skála (ú), ÍF (h), HB (ú) og 07 Vestur (h).

Tá ið leiðslan hjá Víkingi er 9 stig, so verður FM møguleikin varðveittur, hóast tað skuldi hent, at víkingarnir fara at tapa ímóti bæði KÍ í Sarpugerði og HB í Gundadali. Tað er eingin, sum ímyndar sær, at liðið, sum hevur vunnið allar dystirnar í ár uttan ein (í Klaksvík), og sum aftur og aftur avrikar so støðugt og við somu manning, ikki fer at vinna ímóti EB/Streymi, ÍF og 07 Vestur á heimavølli og á útivølli ímóti Skála.

Sannlíkindini eru stór fyri, at Víkingur verður meistari, áðrenn landsliðssteðgin, sum verður undan tveimum teimum síðstu umførunum. 30. september fer Víkingur at spæla á Skála, og tá kann tað væl vera, at FM heitið verður við í viðførinum aftur um Gøtueið.

Í Klaksvík var Páll A. Klettskarð einasti málskjútti, tá ið KÍ vann 1-0 ímóti HB. Hetta var 19. málið í ár hjá toppskjúttanum. Eftir dystin ásannaði Páll A. Klettskarð í samrøðu við Trónd Arge í Televarpinum, at hann og liðfelagarnir ikki hugsa um FM heitið.

-Tað er ov stór frástøða fram til Víking. Eg rokni við, at teir í Eysturkommunu eru farnir undir at fyrireika FM haldið, segði Páll A. Klettskarð.

Leygardagin fer KÍ út á Svangaskarð at spæla ímóti B68, sum hevur brúk fyri stigum.

At bæði Skála og EB/Streymur vunnu ber við sær, at trýstið er stórt á toftamonnum.

Skála vann trivaligan 4-1 heimasigur ímóti 07 Vestur, og EB/Streymur vann tepran 2-1 heimasigur ímóti ÍF.

KÍ – HB 1-0 (1-0)

1-0: Páll A. Klettskarð 6.

B68 – Víkingur 0-2 (0-1)

0-1: Jørgen Nielsen 22.

0-2: Sølvi Vatnhamar br 51.

1-2: Hjalti Strømsten 94.

Dómari: Heini Ziskason Viðoy

Skála – 07 Vestur 4-1 (2-0)

1-0: Maxwell Effiom 16.

2-0: Karl Martin Johansen br 21.

3-0: Ragnar Skála 52.

3-1: Filip Brattbakk br 63.

4-1: Maxwell Effiom 92.

Dómari: Árni Brandsson Petersen

EB/Streymur – ÍF 2-1 (1-0)

1-0: Boubacar Dabo 29.

2-0: Emil Weihe Joensen 46.

2-1: Ruben Møller-Nielsen 52.

Dómari: Dagfinn Forná

B36 – NSÍ 2-2 (1-1)

1-0: Zean Dalügge 30.

1-1: Jesper Van Der Heyden 32.

2-1: Zean Dalügge 51.

2-2: Petur Knudsen br 64.

Dómari: Mohammed Hefezi úr Norra

Máltindurin

23. umfar

Leygardagin 21. september

Víkingur – EB/Streymur: Dagfinn Forná kl. 17.00

B68 – KÍ: Bjarki Danielsen kl. 17.00

07 Vestur – B36: Alex Troleis kl. 18.30

Sunnudagin 22. september

NSÍ – ÍF: Jóhan Hendrik Ellefsen kl. 15.00

HB – Skála: Rúni Gaardbo kl. 17.00